Yn y gwyll nos Wener 13eg Hydref cododd bagad o bobol ifanc dŷ ar Gomin Coedpenmaen (Comin Pontypridd). 

Yn ôl llên gwerin Cymru, os oes yna do ar dŷ a mwg yn dod o’r simdde erbyn toriad dydd, caiff yr adeiladwr fyw yno a ffermio’r tir o’i gwmpas hyd y gall daflu bwyell o ddrws y tŷ.

Creodd Citrus Arts a’n tîm ifanc o Gywion Celf eu Tŷ Unnos eu hunain, fu ar ei draed am bedair awr ar hugain yn garreg filltir dros dro lle’r ymgasglodd pobol, lle chwaraeodd teuluoedd a lle daeth dinasyddion cyfrannog i drafod beth yw bod â lle yn y wlad y gallan nhw’i alw’n gartre.

Nos Wener cychwynnodd y Seremoni Torri Tir Newydd am hanner awr wedi chwech lle gwyliodd y gynulleidfa godi’r tŷ, gyda pherfformiade gan Syrcas Ieuenctid Citrus Arts, Collective Flight Syrcas, Mike Church a jyglwyr, ystadfachwyr, gyda lluniade tân a cherddoriaeth fyw gan Fand Pres Cathays, Côr Cymuned Pontypridd a darn comisiwn arbennig gan y delynores Cerys Hafana.

Pnawn Sadwrn estynnon ni groeso i’r digwyddiad cymuned Torri Bara o ganol dydd ymlaen gyda gweithgaredde teulu, bwyd, gweithdai, a sgyrsie tân gwersyll. Fe wahoddon ni gyrff a grwpie lleol i rannu â ni eu pryderon amgylcheddol a chymdeithasol ynghlwm â’n cartre nawr ym Mhontypridd, a hefyd am ein dyfodol.

Ar fachlud haul nos Sadwrn, perfformiodd yr artist rhyngwladol Mark Anderson ei brofiad sain chwareus a swyngysgol o wewyr a seinie symudol, ‘Nodau o Rybudd’, a grëwyd ar y cyd â Liam Walsh. 
Seinfyd cyfareddol yw Nodau o Rybudd sy’n bywiogi drwyddo drwy berfformiad byw awyr agored sy’n bythol newid. 

Ar y cyd â Chyngor Tref Pontypridd a gyda chefnogaeth Cyngor Celfyddydau Cymru a Llywodraeth Cymru. 
Diolch i Frowen Brothers, y technegwyr goleuo T&M Technical a’r pensaer Tabitha Pope am fentora’r Cywion Celf ar y cywaith.